FacebooktwitterredditpinterestlinkedinmailFacebooktwitterredditpinterestlinkedinmailby feather

ශ්‍රී ලංකාව තුල සිදුවන උපත් 93 කට එක් උපතක් ඔටිසම් සහිත වූ උපතකි.

මොළය වර්ධනයේ දී සිදුවන වෙනස්කම් නිසා ඇතිවන රෝගී තත්ත්වයකි. මොළය නිර්මාණය වී ඇත්තේ ස්නායු සෛල එකතුවෙනි. ස්නායු සෛල වර්ධනය වීමේ වෙනස්කම්  නිසා ඇතිවන මේ තත්ත්වය කුඩා කාලයේදීම ඉස්මතුව ප්‍රකට වේ. මේ තත්ත්වය ඇති අය අවට සමාජයට වෙනස් අයුරකින් ප්‍රතිචාර දක්වයි. එය එකිනෙකාට වෙනස්වන පෞද්ගලික ප්‍රතිචාර රටාවකි. මේ හේතුවෙන් ඔවුන්ට සමාජය සමග සම්බන්ධතා පැවැත්වීමේදී බලපෑම් ඇති වීමට  ඇති ඉඩකඩ වැඩිය. ශ්‍රී ලංකාව තුල සිදුවන උපත් 93 කට එක් උපතක් ඔටිසම් සහිත වූ උපතකි.

ඔටිසම් තත්ත්වයේ ප්‍රධාන ලක්ෂණ වන්නේ වාචික හා වාචික නොවන අදහස් හුවමාරුවේදී ඉක්මනින් නොවැටහෙන තත්වයක් පැවතීමයි. මෙය ප්‍රකට වන්නේ එකිනෙකා අතර සන්නිවේදනයේදී ය. එපමණක් ද නොව ඔටිසම් සහිත දරුවන්ගෙන් පෙනෙන තවත් විශේෂ ලක්ෂණයක් වන්නේ සෙල්ලම් කිරීමේදී එකම ක්‍රියාකාරකම  නැවත නැවතත් කිරීමයි.උදාහරණයක් ලෙස සෙල්ලම් බඩු පේලියට තබා කෝච්චියක් හදන දරුවකු දිනපතාම සෑම විටම නැවත නැවත එම කෝච්චිය නිර්මාණය කිරීම පමණක්ම සිදු කරයි. ඔහුට වෙනත් කිසිදු අදහසක් පහල නොවීම මෙයට හේතුවයි. ආහාර, ක්‍රීඩා හා වෙනත් අංශවල සීමාසහිත බවක් පෙන්වයි. මේ ප්‍රධාන ලක්ෂණවලට අමතරව තවත් කුඩා වූ ලක්ෂණ ද දක්නට ඇත. ඒවානම් , කථනයේ වර්ධනය අඩාල වීම හා සංවේදීතාවයේ වෙනස්කම් ඇතිවීමයි. සමහර විට මෙම තත්වය ඇති දරුවන් මුල් අවදියේදී භාහිර සමාජය සමග සමාජයීය සම්බන්ධතාවය සාමාන්‍ය අන්දමින් සිදු කෙරුනද , දරුවාගේ වයස මාස 15 පමණ වන විට නැවතත් අසාමාන්‍ය තත්වයට පත් වේ.

මෙම තත්වය ඇතිව උපන් දරුවන්ට වෙනත් කායික රෝග වැළදීමේ අවධානමක් පවතී. එවැනි රෝග අතුරින් වලිප්පුව ප්‍රධාන තැන ගනී. ඔටිසම් තත්වය ඇති දරුවන්ගෙන් 40% ක ප්‍රමාණයකට වලිප්පුව ඇති බවට නිරීක්ෂණය වී ඇත. තවත් 10% ත් 15% අතර ප්‍රමාණයක මෙම ළමුන්ට සහජයෙන්ම උරුම වූ (ජාන මගින් හෝ ආරයෙන් ඇති වූ ) කායික රෝගාබාද දක්නට ඇත. තවද ප්‍රතිශතයක් වශයෙන් ගණන් බලා නොමැති නින්ද ආශ්‍රිත ගැටළු තත්වයක්ද ප්‍රකටව ඇති බවට නිරීක්ෂණය වී ඇත.

මෙන්න විශේෂ කරුණක් , ඔටිසම් සහිත දරුවකු ලැබූ දෙමාපියන්ට ඊළග වතාවේදී තවත් එවැනි දරුවකු ලැබීමේ සම්භාවිතාවය 50%ක ගුණයකින් වැඩිය. මේ නිසා ඔබට ඔටිසම් නම් වූ දරුණු නොවන රෝගී තත්වයෙන් දරුවෙකු ලැබුනේ නම් හා ඉන් පසු දරුවන් ඉපද්දීමට බලාපොරොත්තු වන්නේ නම්, වහාම වෛද්‍යවරුන් සමග සාකච්චා කර තීරණයක් ගැනීම අනිවාර්ය බව සලකන්න.

තත්වය මෙසේ වුවද , ඔටිසම් තත්වය තිබේදැයි තහවුරු කර ගැනීමට නිශ්චිත ක්‍රම වේදයක් නොමැත. එය කිසිදු රුධිර පරීක්ෂාවකින් හෝ ස්කෑන් පරීක්ෂාවකින් හදුනාගත නොහැක. රෝග විනිශ්චය කරනු ලබන්නේ දරුවාගේ හැසිරීම ගැන දෙමාපියන්ගෙන් ලබා ගන්නා සාධක සාක්කි මතය. මේ නිසා දෙමාපියන් විසින් තම දරුවන් පිළිබද නිරන්තරයෙන් ගැබුරු විමසිල්ලෙන් පසු විය යුතුය.  යම් හෙයකින් ලිපියේ ඉහතින් දැක්වූ වෙනස්කම් දක්නට ඇත්තේ නම් , වහාම ළමා මනෝ විශේෂඥ වෛද්‍යවරයකු වෙත රැගෙන යන්න. මන් ද නිවැරදිව ඔටිසම් තත්වය හදුනා ගැනීමට ඔවුන් විශේෂඥයන් වන බැවිනි.

සමස්ත ලොව පුරා ඔටිසම් වලට ඇති ස්ථානය සලක බැලීමද වටී.  මේ ගැන සොයා බැලීමේදී පෙනී යන්නේ එය ඉතා ඉහල ප්‍රතිශතයකින් පවතින බවයි. සංඛ්‍යාත්මකව සෑම ළමුන් 68 දෙනෙකුගෙන්ම එක් අයකුට ඔටිසම් තත්වය පවතින බව සමීක්ෂණ වාර්තා පෙන්නුම් කරයි.  සමස්ථ ලොව පුරා සාමාන්‍ය අගය මෙය වුවද ආසියාතික රටවල තනි තනිව ගත්කල මේ ප්‍රමාණය සීඝ්‍රයෙන් වැඩිවෙමින් පවතින බව ද කිය වේ. ඔටිසම් තත්වය වැළදීමේ වැඩි ප්‍රවනතාවයක් ඇත්තේ පිරිමි ළමුන්ටය. ඒ ගැනද සිහි තබා ගන්න. මෙය ජීවිතය පුරාවටම පවතින තත්වයකි. එහෙත් එය සාමාන්‍ය මිනිසෙකු බවට පත් නොකරන තරම් දරුණු තත්වයකට පත්වන්නේ ඉතා අතලොස්සකටය. මෙයින් පෙලෙන්නන් බහුතරයකට සාමාන්‍ය මිනිසකුගේ බුද්ධිය නොඅඩුව පවතී. උපතේදීම විශේෂ අවශ්‍යතා ඇති අයකු (ඔටිසම්) ලෙස ඉපදුනත් කල් යත්ම සාමාන්‍ය සමාජය සමග ගනුදෙනු කිරීමේ හැකියාව ඇති වේ. විශේෂයෙන්ම මතක් කල යුතු වන්නේ මේ තත්වය ඇතිව උපන් ළදරුවකු වයස අවුරුදු 6 ට පෙර කථා කිරීමේ හැකියාව ඇති වුයේ නම් ඔහු යහපත් අතට පත්වීමේ වැඩි නැබුරුවක් පවතී.

සදහන් කල යුතු අවසන් කාරණය වන්නේ මේ රෝගයට මේ වනතෙක්ම කිසිම ඖෂධ ප්‍රතිකාරයක් සොයා ගෙන නොමැති බවයි. ඇත්තේ චර්යාත්මක ව්‍යායාම ප්‍රතිකාර ක්‍රමයකි. ලංකාව තුල අවුරුදු 5ට අඩු ළමා ජනගහනය මිලියන දෙකකි (2) මෙයින් ළමුන් ලක්ෂ දෙකක් පමණ විශේෂ අවශ්‍යතා ඇති ළමුන්ය (ඔටිසම් තත්වයෙන් යුතු).  ළදරු අවදෙයේදීම මෙය හදුනාගැනීම මගින් නිවැරදි මනෝ චිකිත්සක ප්‍රතිකාර වෙත යොමු වුවහොත් රෝගී තත්වය අවම කර ගත හැකිය. වැඩිහිටියන් බවට පත් වූ පසුත් මෙමං රෝග ලක්ෂණ ඉතිරි වී තිබීම සුලබ නොවේ.

 

පාලිත බණ්ඩාර / By Palitha Bandara

සෞඛ්‍ය අමාත්‍යංශයේ සම්මන්ත්‍රණයක් ඇසුරිනි/ HEB